Localisation:


Menu:
Internetowa Liturgia Godzin

Hebdomada sancta
Feria sexta - IN PASSIONE DOMINI

Vesperæ

Vesperæ dicuntur tantum ab iis
qui Actioni liturgicæ postmeridianæ non intersunt.



V. † Deus, in adiutórium meum inténde.
R. Dómine, ad adiuvándum me festína.
Glória Patri, et Fílio, et Spirítui Sancto.
Sicut erat in princípio, et nunc et semper,
et in sæcula sæculórum. Amen.


1  Vexílla regis pródeunt,
fulget crucis mystérium,
quo carne carnis cónditor
suspénsus est patíbulo;

2  Quo, vulnerátus ínsuper
mucróne diro lánceæ,
ut nos laváret crímine,
manávit unda et sánguine.

3  Arbor decóra et fúlgida,
ornáta regis púrpura,
elécta digno stípite
tam sancta membra tángere!

4  Beáta, cuius brácchiis
sæcli pepéndit prétium;
statéra facta est córporis
prædam tulítque tártari.

5  Salve, ara, salve, víctima,
de passiónis glória,
qua vita mortem pértulit
et morte vitam réddidit!

6  O crux, ave, spes única!
hoc passiónis témpore
piis adáuge grátiam
reísque dele crímina.

7  Te, fons salútis, Trínitas,
colláudet omnis spíritus;
quos per crucis mystérium
salvas, fove per sæcula. Amen.


Ant. 1 Atténdite, univérsi pópuli, et vidéte dolórem meum.

Psalmus 115 B
Gratiarum actio in templo
Per ipsum (Christum) offeramus hostiam laudis semper Deo (Hebr 13, 15)

Crédidi, étiam cum locútus sum: *
"Ego humiliátus sum nimis".
Ego dixi in trepidatióne mea: *
"Omnis homo mendax"
Quid retríbuam Dómino *
pro ómnibus quæ retríbuit mihi?
Cálicem salutáris accípiam, *
et nomen Dómini invocábo.
Vota mea Dómino reddam *
coram omni pópulo eius.
Pretiósa in conspéctu Dómini *
mors sanctórum eius.
O Dómine, ego servus tuus, *
ego servus tuus et fílius ancíllæ tuæ.
Dirupísti víncula mea: †
tibi sacrificábo hóstiam laudis, *
et nomen Dómini invocábo.
Vota mea Dómino reddam *
coram omni pópulo eius,
in átriis domus Dómini, *
in médio tui, Ierúsalem.
Glória Patri, et Fílio, *
et Spirítui Sancto.
Sicut erat in princípio, et nunc et semper, *
et in sæcula sæculórum. Amen.

Ant. Atténdite, univérsi pópuli, et vidéte dolórem meum.

Ant. 2 Anxiátus est in me spíritus meus; in me turbátum est cor meum.

Psalmus 142, 1-11
In angustiis oratio
Non iustificatur homo ex operibus legis, nisi per fidem Iesu Christi (Gal 2, 16)

Dómine, exáudi oratiónem meam, †
áuribus pércipe obsecratiónem meam in veritáte tua; *
exáudi me in tua iustítia.
Et non intres in iudícium cum servo tuo, *
quia non iustificábitur in conspéctu tuo omnis vivens.
Quia persecútus est inimícus ánimam meam, †
contrívit in terra vitam meam, *
collocávit me in obscúris sicut mórtuos a sæculo.
Et anxiátus est in me spíritus meus, *
in médio mei obríguit cor meum.
Memor fui diérum antiquórum, †
meditátus sum in ómnibus opéribus tuis, *
in factis mánuum tuárum recogitábam.
Expándi manus meas ad te, *
ánima mea sicut terra sine aqua tibi.
Velóciter exáudi me, Dómine; *
defécit spíritus meus.
Non abscóndas fáciem tuam a me, *
ne símilis fiam descendéntibus in lacum.
Audítam fac mihi mane misericórdiam tuam, *
quia in te sperávi.
Notam fac mihi viam in qua ámbulem, *
quia ad te levávi ánimam meam.
Eripe me de inimícis meis, *
Dómine, ad te confúgi.
Doce me fácere beneplácitum tuum, †
quia Deus meus es tu. *
Spíritus tuus bonus dedúcat me in terram rectam.
Propter nomen tuum, Dómine, vivificábis me; *
in iustítia tua edúces de tribulatióne ánimam meam.
Glória Patri, et Fílio, *
et Spirítui Sancto.
Sicut erat in princípio, et nunc et semper, *
et in sæcula sæculórum. Amen.

Ant. Anxiátus est in me spíritus meus; in me turbátum est cor meum.

Ant. 3 Cum accepísset Iesus acétum, dixit: Consummátum est; et inclináto cápite trádidit spíritum.

Canticum (Phil 2, 6-11)
De Christo, servo Dei

Christus Iesus, cum in forma Dei esset, *
non rapínam arbitrátus est esse se æquálem Deo,
sed semetípsum exinanívit formam servi accípiens, †
in similitúdinem hóminum factus *
et hábitu invéntus ut homo.
Humiliávit semetípsum †
factus obœdiens usque ad mortem, *
mortem autem crucis.
Propter quod et Deus illum exaltávit †
et donávit illi nomen, *
quod est super omne nomen,
ut in nómine Iesu omne genu flectátur *
cæléstium et terréstrium et infernórum,
et omnis lingua confiteátur: *
"Dóminus Iesus Christus!" in glóriam Dei Patris.
Glória Patri, et Fílio, *
et Spirítui Sancto.
Sicut erat in princípio, et nunc et semper, *
et in sæcula sæculórum. Amen.

Ant. Cum accepísset Iesus acétum, dixit: Consummátum est; et inclináto cápite trádidit spíritum.


1 Petr 2, 21b-24

Christus passus est pro vobis, vobis relínquens exémplum, ut sequámini vestígia eius; qui peccátum non fecit, nec invéntus est dolus in ore eius; qui cum maledicerétur non remaledicébat, cum paterétur non comminabátur, commendábat autem iuste iudicánti; qui peccáta nostra ipse pértulit in córpore suo super lignum, ut peccátis mórtui, iustítiæ viverémus: cuius livóre sanáti estis.



Loco responsorii dicitur:

Ant.  Christus factus est pro nobis obœdiens usque ad mortem, mortem autem crucis.


Lc 1, 46-55

Ant. Cum inimíci essémus, reconciliáti sumus Deo per mortem Fílii eius.

Magníficat *
ánima mea Dóminum,
et exsultávit spíritus meus *
in Deo salvatóre meo;
quia respéxit humilitátem ancíllæ suæ, *
ecce enim ex hoc beátam me dicent omnes generatiónes.
Quia fecit mihi magna, qui potens est: *
et sanctum nomen eius,
et misericórdia eius in progénies et progénies *
timéntibus eum.
Fecit poténtiam in brácchio suo, *
dispérsit supérbos mente cordis sui,
depósuit poténtes de sede, *
et exaltávit húmiles,
esuriéntes implévit bonis, *
et dívites dimísit inánes.
Suscépit Israel, púerum suum, *
recordátus misericórdiæ,
sicut locútus est ad patres nostros, *
Abraham et sémini eius in sæcula.
Glória Patri, et Fílio, *
et Spirítui Sancto.
Sicut erat in princípio, et nunc et semper, *
et in sæcula sæculórum. Amen.

Ant. Cum inimíci essémus, reconciliáti sumus Deo per mortem Fílii eius.



Pro precibus laudabiliter adhibetur oratio universalis, quæ invenitur in Missali pro hac die. Tamen ad libitum sumi possunt preces quæ hic proponuntur, vel tacita oratio fieri potest secundum intentiones ibi enuntiatas.

Dómini nostri Iesu Christi mortem pie commemorántes, ex qua mundo vita proflúxit, Deum Patrem deprecémur, dicéntes:
Per mortem Fílii tui exáudi nos, Dómine.

Ecclésiam tuam coadúna.
Per mortem Fílii tui exáudi nos, Dómine.

Papam nostrum N. tuére.
Per mortem Fílii tui exáudi nos, Dómine.

Cunctos órdines et fidéles pópuli tui Spíritu sanctífica.
Per mortem Fílii tui exáudi nos, Dómine.

Catechumenórum fidem et intelléctum adáuge.
Per mortem Fílii tui exáudi nos, Dómine.

Cóngrega christiános.
Per mortem Fílii tui exáudi nos, Dómine.

Iudæos ad redemptiónis perduc plenitúdinem.
Per mortem Fílii tui exáudi nos, Dómine.

In Christum non credéntes luce claritátis tuæ illústra.
Per mortem Fílii tui exáudi nos, Dómine.

Te negántibus signa tuæ pietátis in rebus creátis revéla.
Per mortem Fílii tui exáudi nos, Dómine.

Rempúblicam moderántium mentes et corda dírige.
Per mortem Fílii tui exáudi nos, Dómine.

Omnes tribulátos consoláre.
Per mortem Fílii tui exáudi nos, Dómine.

Defúnctis succúrre.
Per mortem Fílii tui exáudi nos, Dómine.


Pater noster, qui es in cælis:
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.



Réspice, quæsumus, Dómine, super hanc famíliam tuam, pro qua Dóminus noster Iesus Christus non dubitávit mánibus tradi nocéntium et crucis subíre torméntum. Qui tecum vivit et regnat in unitáte Spíritus Sancti, Deus, per ómnia sæcula sæculórum. Amen.
 Based on LITURGIA HORARUM IUXTA RITUM ROMANUM (editio typica)